Пешгирии экстремизм ва терроризм – омили муҳими ҳифзи амнияти миллӣ ва таҳкими рушди устувор

Бо ташаббус ва сиёсати хирадмандонаи Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар Ҷумҳурии Тоҷикистон барои таъмини амнияти миллӣ, ҳифзи сулҳу субот ва пешгирии ҳар гуна зуҳуроти экстремизм ва терроризм заминаҳои мустаҳками ҳуқуқӣ ва институтсионалӣ фароҳам оварда шудаанд. Ҷумҳурии Тоҷикистон ҳамчун узви фаъоли ҷомеаи ҷаҳонӣ дар мубориза бар зидди терроризм ва экстремизм пайваста саҳми назаррас гузошта, бо созмонҳои байналмилалӣ ва кишварҳои шарик ҳамкории густурда ба роҳ мондааст.

Дар шароити ҷаҳонишавӣ, рушди босуръати технологияҳои рақамӣ ва шабакаҳои иҷтимоӣ таҳдидҳои марбут ба экстремизм ва терроризм хусусияти нав касб намудаанд. Гурӯҳҳои ифротӣ аз воситаҳои муосири иттилоотӣ барои паҳн намудани ғояҳои харобиовар, ҷалби ҷавонон ва таъсиррасонӣ ба афкори ҷомеа истифода мебаранд. Аз ин рӯ, масъалаи пешгирии экстремизм ва терроризм танҳо вазифаи мақомоти ҳифзи ҳуқуқ набуда, балки масъулияти тамоми мақомоти давлатӣ, ҷомеаи шаҳрвандӣ ва ҳар як шаҳрванди кишвар мебошад.

Бо ин мақсад Ҳукумати Ҷумҳурии Тоҷикистон Стратегияи муқовимат ба экстремизм ва терроризм дар Ҷумҳурии Тоҷикистон барои солҳои 2026–2030-ро қабул намуд, ки он идомаи мантиқии сиёсати давлатӣ дар самти таъмини амнияти миллӣ мебошад. Стратегияи мазкур ба такмили низоми пешгирӣ, баланд бардоштани сатҳи маърифати ҳуқуқӣ, таҳкими ҳамкории байниидоравӣ, истифодаи технологияҳои муосир, баланд бардоштани устувории ҷомеа нисбат ба идеологияҳои ифротӣ ва густариши ҳамкориҳои байналмилалӣ равона гардидааст.

Яке аз самтҳои муҳими Стратегия баланд бардоштани маърифати сиёсӣ, ҳуқуқӣ ва фарҳангии шаҳрвандон, махсусан ҷавонон мебошад. Пешгирии ифротгароӣ пеш аз ҳама тавассути тарбияи ватандӯстӣ, эҳтиром ба арзишҳои миллӣ, баланд бардоштани сатҳи дониш ва тақвияти худшиносии миллӣ амалӣ мегардад. Ҷавононе, ки соҳиби дониши муосир, ҷаҳонбинии васеъ ва масъулияти шаҳрвандӣ мебошанд, ба таъсири ғояҳои ифротӣ камтар гирифтор мешаванд.

Дар амалисозии Стратегияи мазкур мақомоти давлатӣ вазифадоранд, ки чорабиниҳои иттилоотию маърифатӣ, омӯзишӣ ва ташкилӣ баргузор намуда, сатҳи огоҳии кормандонро нисбат ба таҳдидҳои муосир баланд бардоранд. Аз ҷумла, дар Агентии омори назди Президенти Ҷумҳурии Тоҷикистон нақшаи чорабиниҳо оид ба иҷрои Стратегия таҳия гардида, амалисозии он ба таври мунтазам таъмин карда мешавад.

Дар доираи ин фаъолиятҳо дар Агентии омор чорабиниҳои зерин роҳандозӣ мегарданд:

• баргузор намудани вохӯриҳо, семинарҳо ва суҳбатҳои маърифатӣ вобаста ба пешгирии экстремизм ва терроризм;
• омӯзиши санадҳои меъёрии ҳуқуқии Ҷумҳурии Тоҷикистон вобаста ба муқовимат ба экстремизм ва терроризм;
• баланд бардоштани сатҳи маърифати ҳуқуқӣ ва масъулияти шаҳрвандии кормандон;
• таҳкими фарҳанги истифодаи дурусти шабакаҳои иҷтимоӣ ва технологияҳои иттилоотӣ;
• тақвияти корҳои тарбиявӣ дар самти эҳтиром ба арзишҳои миллӣ, ваҳдати миллӣ ва таҳаммулпазирӣ;
• таъмини риояи интизоми хизматӣ, меъёрҳои ахлоқи давлатӣ ва принсипҳои хизматчии давлатӣ;
• ҳамкории доимӣ бо мақомоти дахлдор оид ба татбиқи чорабиниҳои пешгирикунанда.

Бо дарназардошти хусусияти фаъолияти мақомоти омор, масъалаи ҳифзи амнияти иттилоотӣ низ аҳамияти махсус дорад. Агентии омор ҳамчун мақомоти масъули истеҳсол ва паҳн намудани омори расмӣ вазифадор аст, ки амнияти маълумоти оморӣ, махфияти маълумоти аввалия ва истифодаи дурусти захираҳои иттилоотиро таъмин намояд. Аз ин рӯ, баланд бардоштани саводнокии рақамии кормандон, риояи талаботи амнияти киберӣ ва истифодаи бехатари воситаҳои рақамӣ низ ҷузъи муҳими амалисозии Стратегия ба ҳисоб меравад.

Илова бар ин, баланд бардоштани фарҳанги ташкилӣ, муҳити солими корӣ, риояи принсипҳои шаффофият, қонуният ва масъулиятшиносӣ дар фаъолияти кормандон яке аз омилҳои муҳими пешгирии ҳама гуна омилҳои хавфнок мебошад. Кормандони мақомоти омор бояд ҳамеша намунаи эҳтиром ба қонун, садоқат ба давлат ва хизмати софдилона ба ҷомеа бошанд.

Таҷрибаи байналмилалӣ нишон медиҳад, ки муборизаи самаранок бо экстремизм танҳо бо истифодаи чораҳои ҳуқуқӣ маҳдуд намешавад. Муҳимтар аз ҳама пешгирии пайдоиши заминаҳои иҷтимоӣ ва маънавии паҳншавии ақидаҳои ифротӣ мебошад. Аз ин рӯ, рушди иқтисодӣ, баланд бардоштани сатҳи зиндагии аҳолӣ, таъмини шуғл, рушди маориф, илм ва фарҳанг, инчунин таҳкими ҳамдигарфаҳмӣ ва таҳаммулпазирӣ аз омилҳои асосии муқовимати устувор ба экстремизм ва терроризм мебошанд.

Имрӯз Ҷумҳурии Тоҷикистон ҳамчун кишвари сулҳҷӯ ва ташаббускор дар сатҳи байналмилалӣ сиёсати пайгиронаи худро дар самти мубориза бо терроризм ва экстремизм идома дода, барои ҳифзи амнияти миллӣ ва рушди устувори кишвар тамоми имкониятҳоро сафарбар менамояд.

Дар ин раванд, саҳми ҳар як корманди мақомоти давлатӣ, аз ҷумла кормандони Агентии омори назди Президенти Ҷумҳурии Тоҷикистон, муҳим мебошад. Баланд бардоштани масъулияти касбӣ, риояи қонунгузорӣ, эҳтиром ба арзишҳои миллӣ, ҳифзи манфиатҳои давлатӣ ва иштироки фаъолона дар чорабиниҳои пешгирикунанда кафолати таҳкими сулҳу субот, ваҳдати миллӣ ва рушди устувори Ҷумҳурии Тоҷикистон хоҳад буд.