ОМОРИ БОЭЪТИМОД-ЗАМИНАИ МУҲИМИ РУШДИ УСТУВОРИ МИЛЛӢ

20 октябр -Рӯзи ҷаҳонии омор

Ҳамасола 20 октябр дар саросари ҷаҳон Рӯзи ҷаҳонии омор таҷлил мегардад. Ин сана баёнгари аҳаммияти омори расмӣ дар арзёбии равандҳои иҷтимоию иқтисодӣ, таҳияи сиёсати давлатӣ ва қабули қарорҳои асоснок буда, нақши муҳими кормандони соҳаро дар таъмини ҷомеа бо маълумоти дақиқу боэътимод инъикос менамояд.

Дар Ҷумҳурии Тоҷикистон низоми омори давлатӣ дар даврони соҳибистиқлолӣ марҳалаҳои муҳими рушдро паси сар намуда, тадриҷан ба талаботи иқтисоди муосир ва стандартҳои байналмилалӣ мутобиқ гардид. Агентии омори назди Президенти Ҷумҳурии Тоҷикистон ҳамчун мақоми ваколатдори давлатӣ дар соҳаи омор барои ҷамъоварӣ, коркард, таҳлил ва паҳн намудани маълумоти омории расмӣ, инчунин таъмини эҳтиёҷоти иттилоотии мақомоти давлатӣ, субъектҳои иқтисодӣ ва ҷомеа фаъолияти худро амалӣ менамояд.

Дар солҳои соҳибистиқлолӣ барои такмили низоми омори миллӣ, гузаронидани барӯйхатгириҳои аҳолӣ ва кишоварзӣ, рушди тадқиқоти оморӣ ва беҳтар намудани сифати маълумоти расмӣ тадбирҳои муҳим андешида шуданд. Аз ҷумла, татбиқи стандартҳо ва таснифоти байналмилалӣ, ҷорӣ намудани ҳисоботдиҳии электронӣ ва такмили равандҳои ҷамъовариву коркарди маълумот ба баланд бардоштани самаранокии фаъолияти мақомоти омор мусоидат намуданд.

Яке аз самтҳои муҳими рушди соҳа такмили шаклҳои ҳисоботи оморӣ ва фарогирии масъалаҳои мубрами рӯз мебошад. Дар ин замина, масъалаи таҳия ва тасдиқи шаклҳои нави ҳисоботи оморӣ дар соҳаи тағйирёбии иқлим ва гидрофторкарбонҳо, инчунин такмили шакли ҳисоботи оморӣ оид ба ҳолатҳои фавқулода аҳаммияти махсус касб менамояд.

Ҷорӣ намудани шаклҳои нави ҳисоботӣ имкон медиҳад, ки маълумоти зарурӣ оид ба нишондиҳандаҳои тағйирёбии иқлим, истифода, воридоту содироти гидрофторкарбонҳо ва дигар амалиётҳои марбут ба ин моддаҳо ба таври муназзам ҷамъоварӣ карда шавад. Ин маълумот барои арзёбии равандҳои экологӣ, мониторинги иҷрои уҳдадориҳои байналмилалии Ҷумҳурии Тоҷикистон ва таҳияи ҳисоботҳои миллӣ заминаи иттилоотии боэътимод фароҳам меорад.

Ҳамзамон, такмили шакли ҳисоботи оморӣ оид ба ҳолатҳои фавқулода, аз ҷумла ҷудо намудани маълумот дар бораи осебдидагон ва фавтидагон аз рӯйи ҷинс, гурӯҳҳои синнусолӣ ва маъюбӣ, барои дақиқтар муайян намудани таъсири офатҳои табиӣ ба аҳолӣ ва таҳияи чораҳои муассири пешгирӣ ва ҳифзи шаҳрвандон мусоидат менамояд.

Ин иқдомҳо нишон медиҳанд, ки омори давлатӣ дар баробари инъикоси вазъи воқеии иҷтимоию иқтисодии кишвар, барои омӯзиши масъалаҳои муҳими экологӣ, арзёбии хавфҳо ва таҳияи сиёсати давлатӣ дар асоси далелҳои боэътимод низ нақши муҳим дорад.

Дар шароити рушди босуръати технологияҳои иттилоотӣ ва афзоиши талабот ба маълумоти саҳеҳ, баланд бардоштани сифати омори расмӣ, таъмини саривақтии пешниҳоди маълумот, такмили методология ва мутобиқсозии нишондиҳандаҳои миллӣ ба меъёрҳои байналмилалӣ аз вазифаҳои афзалиятноки мақомоти омор боқӣ мемонанд.

Омори боэътимод на танҳо оинаи вазъи воқеии мамлакат, балки заминаи муҳими банақшагирӣ, пешрафт ва қабули қарорҳои дуруст ба манфиати ҷомеа мебошад.