ҶАЛАСАИ САЙЁР ДАР САРРАЁСАТИ ОМОРИ ХАТЛОН

13 сентябр дар Сарраёсати Агентии омори назди Президенти Ҷумҳурии Тоҷикистон дар вилояти Хатлон ҷаласаи сайёр оиди натиҷаи ҷамъбасти фаъолияти Сарраёсат дар 8 моҳи соли 2024 ва вазифаҳои минбаъда то охири сол баргузор гардид, ки дар он роҳбарияти Агентии омор, роҳбарият ва сардорони раёсату шуъба ва бахшҳои Сарраёсат ва сардорони раёсату шуъба ва бахшҳои мақомоти омори шаҳру ноҳияҳои вилояти Хатлон иштирок доштанд.

Ҷаласаро Директори Агентии омори назди Президенти Ҷумҳурии Тоҷикистон Ҷамшед Нурмаҳмадзода раисӣ намуда, доир ба масъалаи якуми рӯзномаи ҷаласа оид ба вазъи соҳа, махсусан ҳолати ҷамъбасти фаъолияти Сарраёсати омори вилояти Хатлон дар 8 моҳи соли ҷорӣ изҳор нигаронӣ намуд.

Дар рафти ҷаласа барои таҳлили амиқ сухан ба Қосимов Хуршед – сардори раёсати омори кишоварзӣ ва ҳифзи муҳити зисти Агентӣ дода шуда, номбурда қайд намуд, ки соҳаи кишоварзӣ яке аз соҳаҳои муҳими иқтисоди кишварамон ба ҳисоб рафта, барои таъмини яке аз ҳадафҳои стартегӣ, яъне таъмини амнияти озуқаворӣ нақши муҳим дорад.

Аз ин рӯ, Ҳукумати Ҷумҳурии Тоҷикистон ба ин соҳа пайваста таваҷҷӯҳи ҷиддӣ зоҳир менамояд.

Дар ин раванд мақомоти омор низ дар ҷамъбаст ва пешниҳоди маълумоти воқеӣ муввазаф гардида, тибқи Қарори Ҳукумати Ҷумҳурии Тоҷикистон аз 29 ноябри соли 2022, №578 ва супориши Роҳбари Дастгоҳи иҷроияи Президенти Ҷумҳурии Тоҷикистон аз 28 ноябри соли 2023, №41950 (23-3) барои воқеъбинона ва пурра фаро гирифтани ҳар як нишондиҳандаҳо ҷамъоварии ҳамаи шаклҳои ҳисоботи омориро тариқи электронӣ ба роҳ монда, махзани иттилоотии ягона ташаккул додааст ва барои таъмин намудани фарогирии ҳамаи ҳисоботҳои оморӣ пайваста назорат ва корбарӣ менамояд.

Аз рафти натиҷагирии ҷамъоварии ҳисоботҳои омории электронӣ маълум гардида истодааст, ки дар байни мақомоти омори вилоятҳо ва шаҳру ноҳияҳои ҷумҳурӣ вилояти Хатлон ва шаҳру ноҳияҳои он таваҷҷуҳи ҷиддӣ зоҳир накарда, фарогирии ҳисоботҳои омории электрониро дар муҳлатҳои муайянгардида, дар сатҳи зарурӣ таъмин намекунанд, ки ҳолати мазкур боиси ба таъхир афтодани давраи ҷамъбасти маълумоти оморӣ ва таъмин нагардидани ҳаҷми истеҳсоли маҳсулоти умумии кишоварзӣ гардида истодааст.

Аз ин рӯ, зарур шуморида шуд, ки Сарраёсати омори вилоят ва раёсату шуъбаҳои омори шаҳру ноҳияҳои вилоят дар ин самт таваҷҷуҳи ҷиддӣ зоҳир намуда, фарогирӣ ва эътимоднокиву дурустии ҳисоботҳои омориро таъмин намоянд.

Раиси ҷаласа бо натиҷагирӣ аз маърӯзаи Қосимов Хуршед аз кормандони Сарраёсат пурсиш ба амал оварда, ҷиҳати ҷоннок кардани ҳамкориҳо бо мақомоти маҳаллии омор ва бартараф кардани камбудиҳо ҳангоми қабули ҳисоботҳо ва то ҷамъбасти ниҳоӣ дуруст кардани нишондиҳандаҳо дастурҳои мушаххас дод.

Дар рафти ҷаласа оид ба бозбинӣ намудани натиҷаи ҷамъоварии ҳосилнокии ғалладонагиҳо махсусан гандум, истеҳсоли полезӣ ва меваю ангур, ки имсол ҳосили фаровон ба даст оварда шудааст, ба роҳбарияти мақомоти омори шаҳру ноҳияҳо супориши қатъӣ дода шуда, ҷиҳати зоҳир намудани диққати зарурӣ ба истеҳсоли картошка дастурҳои муфид дода шуд.

Дастур дода шуд, ки то охири сол ҷиҳати ба нишондиҳандаҳои маҳсулоти умумии кишоварзӣ ворид намудани нишондиҳандаҳои поруи чорво, барги тут, ғузапоя ва дигар маҳсулотҳои фаронагирифтаи соҳаҳои растанипарварӣ ва чорводорӣ аз ҳамаи имконияту захираҳо истифода намоянд.

Раиси маҷлис қайд намуд, ки саҳми вилояти Хатлон дар ташаккулдиҳии ММД беш аз 60 фоизро ташкил дода, дар сурати ба пуррагӣ фаро нагирифтани субъектҳои хоҷагидор ин нишондиҳанда дар сатҳи ҷумҳурӣ дар сатҳи зарурӣ ҷамъбаст намегардад.

Қайд гардид, ки бо мақсади дар сатҳи зарурӣ ба роҳ мондани фаъолияти мақомоти омори маҳаллӣ Сарраёсати Агентӣ дар вилоят ва мақомоти маҳаллии оморро зарур аст, ки дар доираи Маҷмӯи дастури методӣ оид ба ҷамъоварӣ ва ҷамъбасти ҳисоботҳои оморӣ бо кормандони мақомоти омор ҳар ҳафта як маротиба машғулиятҳои идоравӣ гузаронанд.

Дар ҷаласа аз ҷониби раисикунанда ҷиҳати пешгирии ба ҳолатҳои коррупсионӣ даст задани кормандон, роҳ надодан ба шомилшавии кормандон ба ҳизбу ҳаракатҳои иртиҷоӣ, риояи бечунучарои талаботҳои қонунгузории ҷорӣ дар бораи танзими ҷашну маросимҳо ва таълиму тарбияи фарзандон дастурҳои мушаххас дода шуд.

Дар рафти ҷаласа аз ҳар як роҳбари раёсату шуъба ва бахшҳои Сарраёсати Агентӣ дар вилояти Хатлон пурсиш ба амал оварда шуда, вазъи соҳа мавриди муҳокима қарор дода шуд.

Дар охир муовини якуми директори Агентӣ Асо Нурулло Асват, сардори Сарраёсати Агентӣ дар вилояти Хатлон Ҳакимзода Қурбон ва дигарон ибрози андеша намуда, барои беҳтар гаридидани фаъолияти мақомоти омори маҳал таклифҳо пешниҳод намуданд. Аз ҷониби директори Агентӣ изҳори боварӣ карда шуд, ки таклифу пешниҳодҳо ба инобат гирифта шуда, дар якҷоягӣ ҷиҳати пешбурди соҳа чораҳои самарабахш андешида мешавад.